Un añu de 40 Primaveres

Un añu de 40 Primaveres

Porque’l de les 41 Primaveres ye “el menda lerenda” que ya va pal tiempu del vinu de Reserva, con posu, que namás necesita oriar un pocu pa recuperar toles sos propiedaes y sorprender asina a toa triba de paladares, los que tán avezaos a los vinos mozos y frescos y los que prefieren más l’arume francu y el tastu qu’apurre’l pasu del tiempu y la madera. A lo meyor ye que cenciellamente toi escondiendo dende hai un añu nesta metáfora esa implacable crisis d’identidá que dicen qu’aporta cola cuarentena, el casu ye que, dende qu’arranqué esti proyectu, el pasáu 30 de payares de 2014, día del mio cumpleaños; vivo cola sensación de que, como cantara Sabina, “Cualquier tiempu pasáu foi peor, porque más vieyos yéramos entós”.

Esi día, el 30 de payares de 2013, aconceyábamos en Ribeseya más d’un cientu abondosu de collacios, collaboradores y amigos pa dar el pistoletazu de salida a 40 Primaveres Gastronomía y Comunicación. Yera aquella la presentación d’un proyectu consistente nel fondu, pero inestable na forma, quiciabes yera más una ilusión qu’un proyectu, l’únicu garante de qu’aquello pudiera llegar a furrular nun yera otro que la mio propia confianza , y la de los que m’arrodiaben y arropaben aquel día, unos más de cerca y otros más de lloñe… Toos ellos saben quién son y nun ye momentu agora pa facer recuentu.

Lo que si igual ye momentu de facer un pequeñu balance d’esti primer añu de 40 Primaveres. Nos 356 primeros díes d’esta empresa podemos dicir con arguyu que o bien desendolcamos, o tamos desendolcando trabayos prácticamente en toes y caúna de les estayes que la empresa tenía propuestu posicionase.

Yá llevamos les nuestres prebes, maridaxes y masterclass queseres a conceyos como Ribeseya o Taramunde, tuviemos cola nuestra nuestra cocina rodante ufiertando Show-Cookings en Llanes, Bustio, Ribeseya, Les Arriondes, Madrid, Xixón o Cangas de Narcea. Tamos asesorando a empreses del mundu hosteleru y agroalimentariu, faciendo campañes de marketing de promoción de productos de calidá, dando clases actives de cocina y collaborando con dellos medios de comunicación asturianos.

Enriba la mesa tenemos propuestes pa andechar na creación de plataformes comerciales online, entamar cola producción de delles obres divulgatives… Muncho y bono.

Somos una empresa mui pequeñina pero que cunta con una riestra de collaboradores perimportantes. Freelance del mundo del diseñu y el marketing web, periodistes, cocineros, animadores socioculturales… Toos y toes sois 40 Primaveres, tamién como non, toos y toes los que siguís la nuesa xera al traviés de les Redes Sociales.

Nun me queda otro que davos les gracies, les gracies pol sofitu, dende’l primer momentu por aidame a facer esti suañu realidá. Vamos siguir xuntos “Cocinando emociones” … munches primaveres más.

4 Commentarios

  1. Muchas felicidades Lluis. Espero que las “primaveres” vayan in crescendo en todos los sentidos.

    Contestar
  2. Norabona, Lluis Nel.

    Fai falta más xente que trabaye per, dende y con Asturies na tiesta, y pa enriba con ésitu.

    Abrazos

    Contestar
    • Munches gracies Ruben… Nestos tiempos el conceutu “esitu” ye mui relativu… Trátase de caltener el tipu… ;-)

      Contestar

Envía un Comentario

Tu dirección de correo electrónico no será publicada. Los campos necesarios están marcados *

Puedes usar las siguientes etiquetas y atributos HTML: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>