Amigu Redondo… Amigu Chana… Amigu Juan

Amigu Redondo… Amigu Chana… Amigu Juan

Tres formes de referise a la persona, a la mesma persona. Tres graos de aproximación, prosimida y confianza.

 

Redondo, el técnicu comprometíu cola recuperación de los vinos y viñedos de Cangas en primera persona. Seríu, rectu, formáu a sigo mesmu con nun pocu empeñu, esfuerzu y dedicación, casi que con toa. A Redondo conocíanlu por Redondo dos perfiles de persones bien estremaos. Por un lláu los que lu almiraben pol su trabayu al frente de la Bodega Monasterio de Corias, tantu pola so constancia como pola esponencial meyora y calidá de los vinos qu`ellaboraba añu tras añu. Esos mesmos eran los que dende el respetu y l`almiración reconocien la llabor de Redondo como secretariu primero y presidente del conseyu regulador de la Indicación Xeográfica primero y Denominación d`Orixen depúes de los Vinos de Cangas.

 

Pero tamién lu conocien por Redondo los que nunca supieron nin quixeron entender la política de” pasu a pasu y con bona lletra” de Juan Manuel Redondo Losada. Los que dende’l minutu uno del procesu de recuperación de los vinos de Cangas quixeron garrar atayos; Allá ellos colos sos proyeutos, más productivistes que productivos, más mercantilistes que mercantiles, siempres que nun faigan por confundir, nin por empañar el nome, el procesu, la calidá nin la honestidá de los vinos con Denominación d`Orixen  Vino de Cangas.  Redondo sintió una frase a un amigu y espertu sumiller asturianu de ñacencia y de paciencia y féxola suya pa siempres: “La contraetiqueta de la Denominación d`Orixen Vino de Cangas garantiza que lo que tas tomando ye un vino de Cangas… Tolo demás, ye un actu de fé… Y eso sí, cada unu ye llibre de creer no que quiera o en quien quiera.

 

Chana, el cangues que nun cortexaba muncho con ciertu estereotipu de la sociedá llocal, la “canguesada” como él dicía, foi un rapaz comprometíu cola so tierra y la so xente dende bien neñu. Miembru activu del Cuelmu ecoloxista Pésicu, cuando casi nun esistía nin el conceptu “ecoloxismu” como güei lu pescanciamos, marcho a facer estudios vinculaos a la so tierra y la producción na mesma. Chana fadría grandes amigos ya fuera en Lleon, Lugo o La Rioxa. Y como quien diz por casualidá veríase enroláu de la mano del visionariu Victor Álvarez, comercial morciniegu,que entendería como naide el potencial del vinu de la nuestra tierra, hasta`l puntu de enamorar empresarialmente a Pilar Tetas Marrugat, co- propietaria de Bodegas Pinord, la que nun duldaría en apostar económicamente na creación de la primer bodega de vinos de Cangas con marca de calidá.

 

Pilar, aristócrata y catalana de los pies a la cabeza, ya nun tendrá a Juan pa ir a tomar “unos vinos por el pueblo”, “que ya sabes que aquí s`estila” decía con voz gutural telefónicamente a un de los sos fios la última vez que coincidimos xuntos. Pilar ya conocía a Juan, pa ella  ya nun yera Redondo, de Chana seguru que nin siquiera sintió enxamás falar.

 

Juan yera pa los de casa. Y yo ya yera de casa.  Entá nun tuvi la suerte  de conocer a Jesus, “el mio hermano artista” como él decía, siempre con un aquel socarrón, que guapa la to socarronería Juan… Pero sí me considero amigu de Inés, la so Inés. Pareya  peculiar la d`estos dos, que abríen pa mí la so casa siempres que fuera necesariu.  La última conversación que tuvimos foi tres o cuatro dies enantess de colar pa siempres. El mes enantes tuviera, xuntu cola xente de La Talamera, y cola mió Nuria, qu`almiraba como nadie a esti fenómenu, faciendo visita a la Bodega del Monasterio de Corias, prebando bonos vinos y comiendo lluéu un pote d`escçandalu na l.lariega de la Venta la Chabola, na carretera del Altu L.leitariegos, onde como no tamién taba Inés. Ellí alcordamos que Juan vendría  fasta Ribeseya a falar y prebar vino colos veceros y amigos de La Talamera. La última conversación telefónica foi pa concretar; “si puedes ven con Inés, y vengas solu o non, quedes en casa nuestra.

Nun pudo venir el día 9… pero dende güei tarán con nosotros en sus tres espresines. Amigu Redondo, amigu Chana , amigu  Juan, siempres y en toes y cada una de les copes de bon vino de Cangas que salgan de La Talamera.

 

Lluis Nel Estrada Álvarez

Uva Madura de los Vinos de Cangas 2014

 

 

 

Envía un Comentario

Tu dirección de correo electrónico no será publicada. Los campos obligatorios están marcados con *

Este sitio usa Akismet para reducir el spam. Aprende cómo se procesan los datos de tus comentarios.