..Pa dir entrando na conversación sidrera d`anguañu, y permitanme ufiertar el mio más sinceru puntu de vista alrodiu de la “problemática” desendolcada nel selmanes caberes sobro la potencialidá sidrera asturiana, entecomino lo de “problemática” porque nun se fasta que puntu la mesma ye una rialidá.
El casu ye que d`hai unes selmanes a estos díes paez qu`a los asturianos/es tocamos arrincamos les vestidures, porque el principal diariu escritu n`Asturies “descubrió” que pa dalgunos medios como The Guardian o The New York Times, el referente sidreru peninsular nun yera Asturies sinon Euskal Herria.
Lo más sospresivu de too ye que tanto los artículos referíos a la sidra vasco de The Guardian, como los de The New York Times nun yeren recientes, sinon que ya tenien dellos meses. Munchos de los que trabayamos na órbita del conocimientu gastronómicu ya sabiamos d`esos artículos. Inclusu escritores y articulistes de la talla de Xuan Xosé Sanches Vicente ya espublizaran hai munchos meses, nos sos blogues, alrodiu de lo pescanciáu por The Guardian como les “10 meyores sidreríes d`España” (toes elles llagares vascos).
De magar ehi ríos y ríos de tinta, real y virtual, entamaron a dedicase a esta temática. Dalgo sacáramos en claru, en tantu en cuantu Jose A. Ordoñez, un periodista pa min referencial pola so sensibilidá y profesionalidá, dedicó cerca de la docena de monográficos en La Nueva España, pa desplicamos primero cuala yera la rialidá de la sidra en Euskal Herría y dempués cuala la rialidá de la sidra n`Asturies, convidándomos, pameque, a que sacáramos les nueses propies conclusiones.
A un tiempo, articulistes como el propiu Sanchez Vicente, Jose María Osoro o el economista David M. Rivas tamién participaben del alderique amosando el so puntu de vista alrodiu del mesmu y arriqueciendolu fondamente. Osoro asoleyó, con lluz y taquígrafos, les milenta y una referencies internacionales a la sidra asturiana como referencial, nun solo na península ibérica sinon, como diría Manolín Gafones “nel mundiu mundial”. Sanchez Vicente incidió, una vuelta más en la incapacidá de los asturianos pa defender lo nueso y Rivas decidió aprofitar pa responsabilizar enforma al propiu sector llagareru nes carencies espeyaes pol mesmu a la hora de rentabilizar internacionalmente la so potencialidá.
En mediu d`esti frenéticu alderique, Carlos Delgado, Director Técnicu de Sicer, feria internacional sidrera de calter biañal, fasta agora cellebrada en Xixón, especialista n`enología y prestixáu gastronómu; Comentaba nuna “preba” d`estremaes sidres vasques y asturianes cellebrada en Guipúzcoa que l`escanciáu de la sidra “nun aportaba nada a la mesma”, sinon que más bien valía pa esconder defectos del productu polo que desaconseyaba tala prautica. Que`l Director Tecnicu de una feria sidrera amose tal desconocimientu d`un productu como la sidra asturiana, por muy prestixáu enólogu y gastronómu que seya, dexa n`evidencia munches coses.
Una d`elles ye que, otra vuelta más, carecemos d`esi fadiu provincianismu que mos convida a dexar los nuesos sectores productivos en manos de “especialistes” foriatos, y eso nun mos ayuda pa nada, y más bien perxudícamos. La “corriente enolóxica” que nos años caberos inundó les concencies de los nuesos llagareros y chigreros llevándolos fasta a emplegar terminoloxia vinotera pa referise a la sidra (caldos, bodegues, catas…) ya inclusu a defender “la cata” de sidra tradicional en “catavinos” como formula correcha de prebar la mesma fexo munchu mal a la cultura ya industria sidrera asturiana. Arrenegamos de los nuesos “sabios” de la sidra, que los tenemos y munchos, dexando la potenciabilidá comercial del nuesu producto en manes que son probatiblemente mui espertes en mercadotecnia pero pa nada especialistes en realtar el fechu diferencial de la nuesa sidra asturiana; Fechu diferencial que ye básicu pal futuru d`esti productu.
Llueu vendría la polémica de si la propia Sicer, la nuesa feria mundial de la sidra, colaba d`Asturies camín d`Euskal Herría o de Madrid…inclusu dalgún reputáu llagareru, amás de bon amigu, calificó a Sicer de “feriona” que nun aportaba nada y casique dexaba bien nidio que-y la traía al pairo que nun volviera a cellebrase n`Asturies.
Tan importante ye pa la sidra asturiana el arte del bon escanciáu que`l Direutor de Sicer descalificaba como un bon monográficu en forma de Feria Biañal qu`asitie a la sidra asturiana como capital mundial de la sidra y que se cellebre, evidentemente, na propia Asturies .Lo que pasa ye que el culete de sidra tien que tar bien escanciáu, y la feria sidrera bien enfocada pa que dambos repercutan positivamente nel productu. Y la fargatada de perres que representa Sicer pa beneficiu del sector sidreru asturianu nun se traduz en nada que preste siempres que la representación asturiana se pieslle únicamente a los productos y productores arreyaos a la Denominacion d`Orixen Sidra d`Asturies.
Ensin pretender poner en tela de xuiciu la rellumante trayeutoria de la xerencia de la D.O. Sidra d`Asturies, a un servidor antoxase-y que la sidra d`Asturies ye munchu más que la Sidra con Denominación d`Orixen. Una vuelta más faéseme que tornamos a entamar la casa por teyáu y que lo que el sector sidreru asturianu necesitaba, nel so momentu, yera una figura calificadora de más baxu caláu (llease Indicación Xeográfica Protexía o asemeyada) que regulara la producción de los más 40 millones de llitros que producimos añalmente n`Asturies (la producción de sidra con Denominación d`Orixe anda namai qu`al rodiu del 1’6 millones del llitros). Regulando dafechu la producción sidrera “Made in Asturies” controlaríamos munchu más enforma les importaciones de manzana foriato reduciéndoles a lo indispensable y procuraríamos una producción de sidra “estándar” de muncha más calidá amás d`impulsar globalmente el sector allende les nueses fronteres.
La D.O. Sidra d`Asturies impide que la sidra que nun tea amparada por esti “marchamo” se comercialice como Sidra d`Asturies o Sidra Asturiano, ya tea fecha con manzana asturiana, amestada, o foriata. Anque esi seya el modelu a siguir y oxetivu cimeru de toa marca de calidá que se precie, la rialidá d`el productu dizmos otra cosa, y si non…¿Diganme ustedes el nome d`algún llagar que únicamente ellabore sidra arreyada a la D.O. Sidra d`Asturies?…Yo únicamente tengo un nome na tiesta, y nun m`atrivo a mentalu porque mieu a equivócame.
Hai un par de selmanes cayía nes mios manes una botella de sidra vasco embotellada en botella “asturiana” y etiquetada n`amariellu col mesmu troquel qu`emplega un de los más reconocíos llagares asturianos. A bona temperatura y bien escanciada quedo la segunda nuna “preba ciega” fecha xuntu a una sidra con D.O. Sidra d`Asturies y otra sidra d`un llagar asturianu. D`equi a pocu, si nun mos da por lleer los númberos de rexistru y la lletra pequeña de les etiquetes nes grandes superficies y romeries asturianos podremos tar bebiendo “esquisita” sagardoa vestida d`asturianu… Y la culpa nun sedrá de los collacios llagareros vascos, que evidentemente tan a la suya, sino que sedrá del propiu sector sidreru asturianu y de la desprotección que sufre, de la que toos (productores, hosteleros, instituciones y consumiores), paez que somos un pocu responsables.
Últimos comentarios