Juanjo Arrojo y el Afuega`l Pitu d`Oru 2016

Juanjo Arrojo y el Afuega`l Pitu d`Oru 2016

La Hermandá la Probe de Morcín, entidá organizaora del Certamen del Quesu d`Afuega`l Pitu de la Foz, vien de galardonar col Afuega`l Pitu d`Oru 2016 al fotógrafo afincáu en Xixón Juanjo Arrojo. Estes fueren les pallabres coles que tuvi l`honor de presentar al condecoráu por encargu de la organización, nuna edición descomanadamente especial na que tamién recibía el galardón de “Queseru Mayor 2016″ a títulu póstumu, el nuesu collaciu Fran Sánchez “Temia”

 

Compromisu esti de “glosar” la figura d`un amigu como Juanjo. Porque Juanjo lo primeru de tou, además d`un gran profesional de la fotografía ye un amigu pa cualisquiera que lu conoza. Prósimu, humilde, cercanu, sinceru … Un amigu. Aquella  que nun se considere amiga de Juanjo cenciellamente será persona que refuga por sistema la prosimidá, la humildá, la cercanía, la sinceridá y la honradez… Oseya que nun podrá calificase d`otra cosa más que d`un mal bichu.

Y ye que  resulta complicáu argumentar el porqué  una figura como la de Juanjo Arrojo ye mereceora d`un galardón como`l del Afuega`l Pitu d`Oru ensin destacar los valores humanos d`esti al que mos referimos.

Ciertu ye que Juanjo descubrió l`encantu fotográficu de los quesos d`Afuega`l Pitu fae ya décades.  Allá por 1993 los primeros quesos de Margaría Mier na so quesería artesanal de Les Maces, nesti mesmu conceyu de Morcín, fadríen de distiguíos y estilizaos modelos pal oxetivu de Juanjo. Pocos años dempués llegaríen les desinteresaes collaboraciónes d`Arrojo, añu tres d`añu, pa cola Hermandá La Probe, emprestando les sos semeyes de quesos de puñu y atroncáos, roxos y blancos, pa ilustrar cartelos y cartafueyos promocionales. Ansinamesmo los asemeyos de toa triba de quesos artesanales asturianos illustraríen tamién, de magar entós y la cartelería y publicidá del Certamen de los Quesos Artesanales que la mesma Hermandá de la Probe entama nesti mesmu llugar tolos meses de Setiembre.

Ye l`oxetivu d`Arrojo un de los más espertos y esperimentaos asemeyando a los nuestros quesos artesanales asturianos. En tándem con un servidor Arrojo roblaría les imaxenes de “Cuarenta Quesos, Cuarenta Platos”, obra espublizada pola Editorial Picu Urriellu propiedá y proyectu caprichosu de otru bon amigu de Juanjo y d`esta tierra José Arango, al cual Asturies perdió fae unos días y pal que quiero tener un especial recuerdu.

Editorialmente les perles d`Afuega`l Pitu tamién salen más que bien paraes nes colaboraciones de Juanjo n`obres como “Asturies, el país de los cuarenta quesos y sus recetas”, la mayor obra d`espardimientu de los nuestros quesos artesanales asturianos, espublizada en forma de ficheru coleccionable pol diariu La Nueva España; O “Los Grandes Quesos de Asturias”, edición de gran formatu entamada pola Cofradía de Amigos de los Quesos del Principado de Asturias en el año 2010. De xuru que la riestra d`espublizaciones onde los nuestros quesos salen bien paraos gracies a les semeyes de Juanjo ye muncho más grande, pero llegando hasta equí creo que ya damos bon exemplu de la importancia del so trabayu pa esta pequeña ayalga gastronómica.

Podemos atopar a Juanjo, esti pequeñu gran asturianu en cualisquier puntu cardinal de la nuesa xeografía asturiana. Nun hai certamen gastronómicu, alcuentru musical, festexu tradicional o reivindicación racional, nel que nun tea el que ye creador del mayor y meyor fondu fotográficu d`Asturies cola so cámara.

Gusten-y a Juanjín los quesos d`Afuega`l Pitu blancos y tienros, porque salionos esti pequeñu gran paisano llambión enforma. Come pocu, como paxarín, pero tien nerviu, brenga y cuerda pa munchos años, pa siguir asemeyando, compartiendo, deprendiendo y “arrimando`l llombu” onde seya mester con tolo que tenga que ver, nun solo cola promoción de los nuestros quesos d`Afuega`l Pitu, sinon  cola defensa del futuru d`una Asturies na que faen falta munchos Juanjos Arrojos.

1 Comentario

Envía un Comentario

Tu dirección de correo electrónico no será publicada. Los campos necesarios están marcados *

Puedes usar las siguientes etiquetas y atributos HTML: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>