Facía alendar hai unos dies, xuntu con un collaciu del trabayu y alrodiu d`unes botelles de sidra, dalgunos d`esos recuerdos de la infancia que se caltienen persiempre a sabiendes de que formen parte de lo que, en conxuntu, pescanciamos como la esencia d`una vida. Esencia, memoria y recuerdu, nun solu d`una infancia, sinon ya por disgracia d`un pueblu y unes costumes casique desaniciaes. D`un pasau que difícilmente se recupere. D`una Asturies que, en conclusión, casique ya nun esiste.

Entramos, anguañu, na denomada “temporada del oriciu”. Una dómina que siempres trescurriu alrodiu d`un productu llariegu como ye`l nuesu “oriciu” o “arcín” según teamos nel cientru occidente o nel oriente astur, y que cada añu se ve más desvirtuada pola falta de productu llariegu y pol aporte estemporaneu d`oricios foriatos, agüarones, desaborios y roinos.

Tradicionalmente oricios y sidra siempres se conxugaron a la perfección. Nes villes mariñanes y sidreres estilábase una forma d`espicha, prácticamente ya escaecida. La Oriciada o Arcinada. Alrodiu de sacos d`arcinos, tables y mazos de maera y llitros y llitros de sidra, discurrien velaes demientres los meses de Febreru y Marzu. Coincidien nel tiempu, los meyores meses pa la “piesca” del arcín colos meses de preba de dalgunos de los toneles de la primer sidra del añu, nos que les más de les vegaes, finábase por dar  bona cuenta de la sidra aneyo que quedara pol llagar.

Yeren otros tiempos. Tiempos nos que se desendolcaben auténtiques romeries nos pedreros a la gueta d`oricios. D`aquella entá nun tuviera feríu de muerte`l nuestru Cantábricu, nin esquilmaos los nuesos pedreros pola presión comercial. El nuesu mar producía y rexenerabase alcordies a una supuesta normalidá. Homes, muyeres y neños baxaben a los pedreros por caleyes y desventios, col finxu d`abastecese d`aquel frutu d`arumes marinos qu`atarraquitaba les poces ya fuera de los pedreros de Berbes, Vega, Tereñes, Arra o Borines, por nomar a cinco d`estes “güertes acuátiques” nes que, dalguna vegada, siendo neñu, me tocó dir a facer collecha.

Güei, cuando paso al llau d`un chigre a mediaos de Payares, finales d`Avientu o primeros de Xineru, y lleo eses pizarres cola lleenda “Hai Oricios”, nun me queda más qu`entrugame ¿”Hai Oricios”? ¿Qué Oricios nesti tiempu? ¿Qué queda d`aquella rialidá…? Y demientres sigo caleyando allegame a les ñarres l`arume del salitre y enllenaseme la boca de sabor a sal marín. Y alcuerdome de ver una pota fervollando enrriba la chapa la cocina, enllena d`arcinos:

– Muyer, esos arcinos ya tan, saca-yos l`agua que ta esperando Cesar colos collacios nel llagar. El rapaz bien conmigo. Tate tranquila que nun tardamos.