El pasáu mes de xunu presentábase públicamente el plan internu de formación ya incentivación d`escanciadores que, de magar hai cerca tres años, vien desendolcando Sidreries Tierra Astur pa colos sos trabayaores. A un tiempo aprofitose la ocasión p`asoleyar tamién la figura del “mayestru escanciador” de Sidreríes Tierra Astur, representada na persona de Sabino Perez Presa, un profesional sidreru de contrastada esperiencia que rexentó establecimientos como la popularísima Sidrería Los Portales de La Pola Siero, o la Sidrería Cantábrico n`Uviéu y que dende hai cerca de dos años trabaya en Sidreries Tierra Astur.
Embaxu la lleenda “Tierra Astur: Escanciadores de Campeonato” la Sidrería Tierra Astur Águila de Cualloto abellugó un dinámicu actu de presentación nel que taben convidaos toa triba de medios de comunicación, llagareros proveedores de la firma, personalidaes arreyaes al mundu de la sidra asturiana y representantes del mundu empresarial y formativu asturianu. Nun fueron munchos los asistentes pero si notable la repercusión mediatica, incluyéndose una conesión en direutu col programa “La Mañana” de TVE nel que Perez Presa pudo facer una pequeña “preba” de sidra y escanciáu en vivu pa más de tres millones d`espeutaores (audiencia estimao).
Nada ye fortuitu. La presentación del pasáu mes de xunu ye frutu d`un abegosu trabayu cohesionáu pente xerencia, dirección hostelera, dirección formativa y dirección gastronómica d`esta humilde empresa asturiana. Hai años que llegamos a la conclusión de que si naide s`esmolecía en formar a los nuesos profesionales tendríamos que ser nos mesmos los que mos encargaramos d`esa xera. Tamién aldovinamos que si nadie s`encargaba de dignificar enforma la figura del escanciaor nos mesmos tendríamos que facelo. La sidra asturiana ensin un escanciau curiosu nun tien sintíu…y les sidreríes menos.
Cursos teorico-practicos d`escanciáu, visites didautiques col personal a llagares y pumaraes, prebes internes d`escanciáu, pagu de complementos salariales según la calificación del escanciaor, participación regular con un equipu formáu por seyes escanciaores nel Campeonatu d`Asturies d`Escanciadores de Sidra (el campeonatu del mundu), Afalamientu de la figura del “mayestru escanciador” como la de un profesional espertu asemeyau a lo que ye un “sommelier” nel mundu del vino…
Estos son los pegoyos sobre los que se sofita el nuesu propiu plan formativu y d`afalamientu del escanciáu y escancidor. Demientres tantu, los planes formativos asturianos d`Hostelería, tantu públicos como privaos, siguen viviendo ayenos a la rialidá de la propia hostelería asturiana. De la escuela d`Hostelería saldrás sabiendo decantar un esquisitu vinu Rioja de Reserva, o sabiendo facer unos afrancesaos “creps suzette a la vista al veceru”. Pero d`echar un culete, o saber cuando una sidra ta “filao”… d`eso nada de nada.
Nun pretendemos capitalizar nada de lo que mos arrodia nesti proyectu. La presentación pública de l`otru día guetaba precisamente tolo contrario; Que s`esparda esti proyeutu y que se trabaye nesta dirección dende la coleutividá sidrera asturiana. Perez Presa ye`l nuesu “mayestru escanciador”, el “mayestru escanciador” de Sidreríes Tierra Astur.. Como él hai una riestra importante de profesionales d`hostelería sidrera que tienen tamién el drechu propiu de facer gala d`esta definición. La trayectoria profesional desendolcada nun oficiu tradicional ye la que varema la capacitación d`estos espertos demientres nun esista dengún otru métodu formativu o de baremación, y al pasu que vamos faiseme que va avagamos.
Últimos comentarios