Tres d`un añu d`esistencia de la Bona Cofradía de los Siceratores d`Asturies, esti colectivu cellebraba el sábadu 17 de Mayu el so segundu Gran Capitulu.
Pa los profanos nesto de les cofradies gastronómiques puede nun arresultar cenciello pescanciar que representen rialmente estes agrupaciones qu`embaxu l`apellidu de Orden, Cofradía, Circulu, u Asociación arrexunten a Caballeros, Amigos, Defensores o Siceratores, en pro de productos como los Nabos, el Sabadiegu, la Sidra, l`Anchoa de Santoña, el Gamonéu o el Chosco de Tineo. La so estética y les sos formes, la nuesa porque tengo l`arguyu de formar parte dende`l so aniciu d`esta cofradía, caleya pente lo medieval, lo masónicu, lo lúdicu y lo friki a partes iguales.
Pa dalgunos puede tener un aquello ritualísticu, pa los más collorista, pa unos pocos, y nun sere yo, aun siendo Cofrade Sicerator de númberu quien lo ñegue, quiciavis un daqué «enranciao», pero lo ciertu ye que esti tipu de coleutivos tan faciendo un trabayu pergrande na promoción y defensa de productos agroalimentarios d`alta calidá dende los llugares de producción y orixe de toos y caun d`ellos. Equí, n`Asturies, dempués de munchos años cuntando con unes poques Cofradíes de renome y llarga trayectoria tales como los Caballeros de la Orden del Sabadiegu, los Amigos de los Quesos del Principado o los Amigos de los Nabos de Morcín, nos últimos años y meses tamos viendo como estos colectivos espoxiguen d`aquella manera con incorporaciones tales como la de la Cofradía del Gochu Asturcelta, la mentada Bona Cofradía de los Siceratores d`Asturies, El Circulu Gastronómicu de los Quesos Asturianos, la Cofradía d`Amigos de les Fabes de Villaviciosa o la recién estrenada Cofradía del Arroz con Lleche de Cabranes. El casu ye que, como decíamos nun entamu, el pasáu 17 de mayu axuntabense en Nava más d`un cientu de cofrades, hermanos, amigos y caballeros defensores de más de venti productos de más cerca y de más lloñe. Una preba de sidra de pera, sidra de xelu y aguardiente de sidra precedieron a un desfile peles cais navetes, capitaneáu pola Banda de Gaites La Kadarma y que concluyó cola cellebración d`un Gran Capitulu nel que los grandes protagonistes foren los primeros Cofrades d`Honor de la sidra d`Asturies. Xuntu a Carlos Martín, presidente de FECOES (Federación de Cofradies Españoles) arreyáu a Asturies y activu defensor de la sidra na diáspora foren distinguíos cuatro grandes profesionales y en mayor o menor medía apreciaos amigos.
Un placer tenevos na Bona Cofradía de los Siceratores d`Asturies. Emilio Serrano, recuperador pal nuesu padrimoniu del Aguardiente de Sidra d`alta calidá. Samuel Trabanco, másimu esponente del resurdir de la sidra natural dientru y fuera de les nueses fronteres. Nacho Manzano, embaxador de la cocina asturiana del sieglu XXI ensin pa ello perder el posu de la esencia de lo propio. Cesar Suárez, dignificador del productu asturianu y benditu transgresor del conceptu de la sidrería asturiana en nuestru tiempu.
Bienllegaos collacios.
Últimos comentarios