Sidra d`escoyeta. La «Pata Negra» o Sidra Seleccionada

SIDRAPaez que foi ayeri cuando un grupu de llagareros asturianos, cabezaliaos po`l xixonés Samuel Trabanco decidieran crear una marca de calidá qu`abellugara una producción de sidra fecho con manzanes asturianes escoyies pente dieciocho variedaes estremaes. Esta marca de calidá aniciaríase enantes que la propia Denominación d`Orixen Sidra d`Asturies y delantre de la posibilidá de que, nun entamu, aquella cacarexada denominación sidrera nun diera cobertura a la sidra asturiana “de tola vida”, al tar afalada por sector champaneru. De fechu, nun entamu, la D.O. Sidra d`Asturies esclusivizaría tala denominación (la de “Sidra d`Asturies) pa la  Sidra Brut ellaboráo con manzana asturiana, demientres que la pa Sidra de tola vida  reservaríase el revesosu nome de “Sidra Natural d`Escanciáu Tradicional”  (¿?)

Cuatro foren los llagares qu`entamaren con esa iniciativa (Trabanco de Xixón, Gobernador de Villaviciosa, Muñiz de Tiñana, y Foncueva de Sariegu), consiguiendo en perpocu tiempu l`apodu pente los sidreros y chigreros asturianos de “sidra de Pata Negra”, pola calidá del so productu. Dempues averaríanse col tiempo a esta marca otros llagares como Peñón, de Carreño, y Escalada, de Xixón.

Preba de la Sidra de la Cai Gascona

Preba de la Sidra de la Cai Gascona (Uviéu)

Agora, cola Denominación d`Orixen “Sidra d`Asturies” furrulando cada vegada más; La “Sidra Natural de Manzana Seleccionada”, la “Sidra d`Escoyeta” cumple 11 años y nun baxa la guardía pa siguir siendo una marca de calidá de referencia nun solo n`Asturies, sino na totalidá del mundu sidreru.

Pente, otros, tien amás el méritu de ser la única sidra del mundu recoyía nel “Arca del Gustu” de la Fundación Slow Food pa la Defensa de la Biodiversidá, tantu pola so calidá como pola so influyencia na recuperación de determinaes tribes autoctones de manzana, asina como pol so interés na salvaguarda del profesional de la sidra, na salvaguarda del escanciaor de manos y pies. Un “Slow Work” en toa regla que los profesionales hosteleros asturianos tenemos la obligación de defender y afalar  compitiendo con impersonales “maquinines” que lo único que faen ye “machacar” el productu y desaniciar la nuesa profesión y cultura sidrera.

 

Nun ye cenciello pa los llagareros llegar a colgar la so propia contraetiqueta de calidá. Cuatro prebes añales dirixies por espertos prebaores de la talla de Maximino Villarrica, Belisario Suarez, Orlando Valledor, Severino Cueva o Sindo Martínez, encárguense de cribar los estremaos “palos” o llotes presentaos polos llagareros permitiendose contraetiquetar cola marca de calidá namai que a los llotes que superen un siete sobre diez na preba en cursu.

Sidra d`Escoyeta

Contraetiqueta

Trabanco Cosecha Propia, Foncueva Selección, Muñiz Selección y Peñón Selección son les marques “d`escoyeta” qu`anguañu, once años después, se caltienen nel mercáu, faciendo coses tan prestoses como sacar la so “primer sidra del añu” fecho enriba “la madre”, ensin trasegar, algamándose un productu frescu, vinu y natural d`alta calidá.

La Sidra d`Escoyeta, o Sidra de “Pata Negra”, o más formalmente  Sidra Natural de Manzana Seleccionada ye un exemplu de virtú d`un sector como tamién lo ye la Denominación d`Orixen “Sidra d`Asturies”… Too suma y nada resta, cuando lo que queremos ye sumar y non restar.

Envía un Comentario

Tu dirección de correo electrónico no será publicada. Los campos obligatorios están marcados con *

Este sitio usa Akismet para reducir el spam. Aprende cómo se procesan los datos de tus comentarios.