Pregón de les fiestes del Bollu 2013. Sociedá La Peruyal. Les Arriondes. Parres

Autoridaes.

Presidente de la Sociedá La Peruyal.

Reina y Dames d`Honor de Les Fiestes del Bollu.

Peruyales y peruyalos:

Nun se cómo entamar. Esa ye la idega que tengo na tiesta nel precisu instante nel qu´arranco a esbozar les primeres llinies d`esti pregón nel bloc de notes del mio IPhone…Nun se como entamar. Y ye de recibu trasladávoslo, como de recibu ye agradecer a la Sociedá La Peruyal que cuntara conmigo pa pregonar estes Fiestes del Bollu 2013.

Dende que me lo comunicaran, fae agora cerca cuatro meses, acarreto un sentimiento d`orguyu y responsabilidá por partes iguales que casique me bloquea. Porque son tantes, tantísimes les coses que quisiera cuntar dende equí güei, y tan poca, tan poquitísima la culpa y necesidá que teneis vosotros de aguantar esti rollu, que nun se por onde tirar.

Hónrame más si cabe la mio condición de pregoneru porque los que me conoceis bien sabéis que siéntome parraguesu ensin selo y peruyalu hasta la médula. Porque equí pase diez años vitales na mió vida y porque, ensin arrenegar enxamás de la mió condición de ribeseyanu, equí me tengo prometíu siguir venceyáu pol restu los mios díes.

La mio vinculación, el mio venceyamientu con esti conceyu de Parres y con esta villa ribereña de Les Arriondes vien dende que soi bien neñu. Porque quixó el destín que mi pá, Lluis el de Xenra, o Lluis el de la Xenra, ñacíu nel caseríu del mesmu nome y asitiáu en Calabrez siempres tirara con munchisima facilidá pa esti conceyu aunque viviéramos nel Picu, a bien poquitinos metros de la playa y a un pasu del centru de Ribeseya, con namas cruciar la ponte.

A Les Arriondes veníamos tolos años aquí, a esta mesma plaza del Cañon a mercar “en lo de Pelayo” les pataques pa sembrar en Torre. Un sábadu al mes, polo menos, abríase d`un esmenón la puerta`l mio cuartu y el vozarrón de mio padre esconsoñabame al glayíu de Vamos hasta Les Arriondes. Y al mercáu veníamos col Simca 900 tenquetienes, aparcábamos onde “La Asturiana” y les paraines por “La Xunca”, el “Campoamor”, el “Mirador” o “La Herradura” a departir colos cazaores faiense rutina prestosa p`aquel neñu que yera yo y que pa nada camentaba lo que “Les Arriondes” diba significar pa min nun futuru.

Amas, n`aquellos viaxes aprovechábamos pa facer les merques de lo más estremaes. El carrete nuevu pala caña de pescar nel rompiente, o una cañina pa dir al “reo”, en “lo de “Titi”; les broques pal taladru naranxa Black and Decker de última xeneración na Ferreteria d`Emilio Pando; aquella camisina tan prestosa na boutique de moda de la comarca; los chorizos de la carnicería de Fernando… Merques, que a min ya me facien pescanciar aquello de qu`esti pueblín tenía visos de ser la capital comercial de la fastera, y que siempre yeren xustificaes pol mio padre cola sempiterna proclama de “Ye que na Villa (por Ribeseya), aparte que nun lo hai, nun puedes mercar nada porque e que t`abrasen”

Y que dicir de Les Piragües de la mio infancia. El Simca 900 facía aunténticos tramos de “scracht” que ya quisiera Carlos Sainz pente Ribeseya y Les Arriondes al través de la carretera Calabrez col finxu de poder esfrutar de la salida y la llegada de les piragües munchu antes que nin se plantegara la posibilidá de que la tele mos ufiertara l`esfrute de la carrera, de forma íntegra, o como se lleva agora“descafeinada”

Ciertu ye que la mio vinculación coles Fiestes del Bollu y cola Sociedá La Peruyal nun aportaría fasta que con 21 años esiliárame nesti conceyu. Y si, digolo asina, aquello foi casique un esiliu.  Col macutu, mui poca esperencia y munches ganes viniera a trabayar como cocineru al Español, y de pasu vinierame a vivir. La escusa de nun tener carné foi la meyor de les posibles pa decidime a arrendar un áticu na Cai de Sta. Rita y entamar a facer vida de pareya con Blanquina hasta que mos casamos y entamaos a guetar meyores ñeros.

Y foi a partir d`entós cuandu les Fiestes del Bollu de la Sociedá La Peruyal reveláronseme como la meyor de les fiestes posibles. Porque ye esti un pueblu que, aparte de montañes, riu, hospital, bon comerciu y paisaxe, si de dalgo pue presumir ye precisamente d`eso… De Sociedá. De paisanaxe. Ye esta una villa onde atopes con quien charrar en cualisquier chigre o requexu. Un conceyu con estrema vitalidá en tolo  que se referir a asociacionismu, seya cultural, social o deportivu; Un pueblu onde l`alderique y la reivindicación sana siempres tan presentes.

Pero sobro tou, y centrándomos no que mos trae equi güei, ye esti un conceyu y una villa n`onde la folixa ye tan importante como el trabayu porque además considérase fonte de recursos como la que más. Ser capital de la “Movida del Oriente” demientres décades, nun se consigue d`un día pa otru amiguinos y amiguines.

L`esfrute d`una folixa pa un parraguesu o parraguesa estrapola lo exclusivamente lúdicu. El parraguesu nun va de folixa simplemente por “correla”, que tamién. El parraguesu, consciente de que les fiestes de El Bollu, Les Piragües, La Castaña, El Carme o Sta. Rita conformen parte de la rialidá económica d`esta villa lo mesmo que les pequeñes romeries y fiestes de prau de to`l conceyu conformen l`ADN d`esti pueblu; fae Bechmarking, que dirien los técnicos marketinianos. “Análisis de la competencia”. El parraguesu fae autenticu “trabayu de campu nes fiestes de prau”. Por eso ye factible atopar a un garrapiellu de rapazes y rapazos de Les Arriondes lo mesmu en La Velada de la Portilla de Llanes, que nos encierros d`Ampuero o los mismísimos Sanferminos. Por eso el mismu grupu de incansables trabayaores de la folixa braniega pue ser vistu na mesma nueche En El Carmen de Les Arriondes, Santa Llucia en Sotu Cangues, y el Festival de la Sidra de Nava.

Comu vos decía Les Fiestes del Bollu foren trescalando pocu a pocu tamién nel mio propiu sangre. Pente otres coses porque tuvi la suerte de conocer de cerca la fiesta de la mano de Nano, demientres los mios años nel Café Español. Algo de llotería vendí, sociu me fice por aquel entós y socios averé a la Sociedá La Peruyal. Dalgún poema que otru escribí, xuntu con articulinos varios na so Revista. D`asturianu me vestí, xuntu con Blanca y toa aquella llacuada de peruyalos y peruyales de tou pelaxe a los que nun voi nomar equi güei porque de sobra sabeis quien sois. Pipes de sidra arrecostinamos añu tres d`añu enllenes primero y vacíes dempues. Pingaures enforma garramos el día del Bollín.

El Bollu y el Bollín. Sería un desplante pola mio parte como cocineru y supuestu gastrónomu nun facer referencia a los protagonistes que dan nome a esta fiesta. Tan humildes como contundentes. El bollu preñau, protagonista de tantes y tantes fiestes asturianes ye`l bocáu indispensable tamien na nuestra fiesta. Chorizos, a ser posible ellaboraos con papada de gochu, con un aporte grasu cercanu al 70 por ciento, pimentón dulce de calidá, sal y ayu. Un lixeru toque de fumu y no más de dos o tres dies de curación, eso, sumáu a la mano de un maestru panaderu que consiga esa masa cruxiente y esi pringe esactu nel interior. Nun hai vexetarianu que nun se rinda a un ñiascu del manxar cimeru, xuntu cola bona sidra, de les fiestes de La Peruyal.

Quien mi lo diría hai años!!  Equi toi engoláu dando`l pregón de les Fiestes de La Peruyal.

Siempres hai pequeños detalles que ti queden guardaos nel discu duru la memoria, comu`l que, agora hai cuatro meses, cuando m`encargaren esti pregón se mi reveló por un instante. Hai agora catorce años Manuel Cuadriello Sánchez, fiu de Manuel Cuadriello Soto, un de los iniciadores d`esta folixa pidiome que-y echara un gabitín na revisión y redacción del so pregón pa esta mesma fiesta. Nesi pregón Manolo resumía les fiestes como yo nun sabría facer meyor… Unise, entrellazase, tirar voladores, tocar tambores y gaites, desfilar en carroza, merendar, beber, cantar xuntos, baillar, contar esperances, proyectos, ilusiones, gozar de los felices alcuentros, gustase, querese, revolcase, allargar les nueches, amanecer tarde… Y recordaba`l mio amigu Manolo además a los que ya nun tan con unos sentios versos…

No por vos, sino por mí…Soledad tengo de tí…

A estes altures de la película un servidor nun tien claru qu`esista el cielu nin el infiernu, pero si toi comencíu de que n`otra dimensión hailos que tamién tan entamando, nesti precisu instante a celebrar tamien les Fiestes de La Peruyal. Y xuntu a Ichaso, Linón, Celso, Cuadriello,  Tomás y tantos otros, ta tamien agora Nano, tomando un vinu con Ramón El Roque, demientres Javier Cuadriello fala con Emilio Llamedo de salmones y piragües y Belisario desplica a Blanquina y Manolo Millan como se xuega a los bolos a la par que tomen un bon culete.

Agora más que nunca, nadie nun va a agüamos les Fiestes. Nin les del Bollu de La Peruyal ni nenguna otra. Güei nun vamos falar de miseries, nin facer referencia a “indeseables”. Nin güei, nin mañana nin el llunes vamos dedicar un  solu segundu a los que nun formen parte del pueblu. Y digo del pueblu, non del barriu, de la villa o del conceyu. Digo del pueblu porque esta ye una fiesta popular y populosa, referente y a la que hai que deseyar llarga y provechosa vida, como llarga y provechosa vida merez la Sociedá La Peruyal, la villa de Les Arriondes y el conceyu de Parres.

Vais dexame que acabe esti pregón, cantando, o a lo menos reproduciendo les lletres d`un de los cantares que bien tien que rescamplar escontra`l Sueve estos díes…

Diz El CuartetuTorner, nel so canciu “Les Arriondes” dedicau a los Amigos de Parres, dedicáu a Parres entera…

 VIVA ARRIONDES, VIVA ARRIONDES

 VIVA LA XENTE TRONERA

 VIVA EL CONCEYU DE PARRES

 Y LA XENTE RIBEREÑA

  VIVA´L CONCEYU DE PARRES

 VIVA ARRIONDES LA MIO TIERRA

 Amigos y amigues glaya-y conmigo…

Puxa les Fiestes del Bollu…!!

Puxa la Sociedá La Peruyal!!

Puxa Les Arriondes!!

Puxa Parres!!

Puxa Asturies!!

(Testu íntegru del pregón de Lluis Nel Estrada de les Fiestes del Bollu de la Sociedá La Peruyal 2013. Les Arriondes)

2 Commentarios

  1. Nunca viví estes fiestes, pero a través desti pregón, soy de les fiestes del bollu, de La Peruyal y de Arriondes.
    Prestome abondo pol sentimiento que mana nesti pregón.
    Viva Lluis Nel y La Peruyal.

    Contestar
  2. ¿cuántu lloraste y cuántu sonreisti mientras escribías esto? ¡muy guapu Lluis!

    Contestar

Envía un Comentario

Tu dirección de correo electrónico no será publicada. Los campos obligatorios están marcados con *

Este sitio usa Akismet para reducir el spam. Aprende cómo se procesan los datos de tus comentarios.