¿HAI ORICIOS?

Facia alendar hai unos dies, xuntu con un collaciu del trabayu y alrodiu d`unes botelles de sidra, dalgunos d`esos recuerdos de la infancia que se caltienen persiempres a sabiendes de que son parte de lo que, en conxuntu, podemos denomar “la nuesa particular memoria hestorica”. Memoria y recuerdu, nun solu d`una infancia, sinon ya por disgracia d`un pueblu y unes costumes ya desaniciaes, d`un pasau que difícilmente se recupere, d`una Asturies que, en conclusión, ya nun esiste.

Entramos anguañu na denomada “temporada del oriciu”. Una dómina que siempres trescurriu alrodiu d`un productu llariegu como ye el nuesu “oriciu” o “arcín” según teamos nel cientru occidente o nel oriente astur, y que cada añu se ve más desvirtuada pola falta de productu llariegu y pol aporte estemporaneu d`oricios forasteros, agüarones, desaborios y roinos.

Tradicionalmente oricios y sidra siempres se conxugaron a la perfección. Nes villes mariñanes y sidreres estilábase una forma d`espicha prauticamente ya escaecida, la “oriciada” o “arcinada”. Alrodiu de sacos d`arcinos, tables y mazos de maera, y llitros y llitros de sidra, discurrien les tardis demientres los meses de Febreru y Marzu, coincidiendo temporalmente los meyores meses pa la “piesca” del arcín, colos meses de preba de dalgunos de los primeros caldos del añu, en los que les más de les vegaes, finábase por dar bona cuenta de la sidra aneyo qu`hubiere nel llagar.

Yeren otros tiempos. Tiempos nos que se desendolcaben autentiques romeries nos pedreros a la gueta d`oricios. D`aquella entá nun tuviera feríu de muerte el nuesu Mar Cantábricu, nin esquilmaos los nuesos pedreros pola presión comercial. El nuesu mar producía y rexenerabase alcordies a la normalidá d`aquella dómina. Homes, muyeres y neños baxaben a los pedreros per caleyes y desventios, col finxu d`abastecese d`aquel frutu d`arumes marinos qu`atarraquitaba les poces ya fuera del pedreru de Berbes, Vega, Tereñes, Arra o Borines, por nomar a cuatro d`estes “güertes acuatiques” nes que, dalguna vegada, siendo neñu, me tocó dir a facer collecha.

Güei, cuando paso al llau d`un chigre a mediaos de Payares, finales d`Avientu o primeros de Xineru, y lleo eses pizarres cola lleenda “Hai Oricios”, nun me queda más qu`entrugame ¿”Hai Oricios”? ¿Qué Oricios hai nesti tiempu? ¿Qué queda d`aquella rialidá…? Y demientres sigo caleyando allegame a les ñarres l`arume del salitre y enllenaseme la boca de sabor a sal marín… Y alcuerdome de ver una pota fervollando enrriba la chapa la cocina, enllena d`arcinos. – Muyer, esos arcinos ya tan, saca-yos l`agua que ta esperando Cesar colos collacios nel llagar. El rapaz bien conmigo. Tate tranquila que nun tardamos.-