Amigos y collacios de viaxe

caminosHai una persona, mui especial pa min, que anda la probe de cabeza al rodiu del conceptu de l`amistá. Más que nada porque sigún van pasando los años, los meses y casique les selmanes, va discubriendo nuevos estadios, o meyor nueves desilusiones en tornu a esti conceptu que se-y antoxa del mesmu calibre que`l de la fraternidá, la paternidá o la maternidá. Y por disgracia, o por suerte, a lo menos a los mios güeyos, esto nun ye asina. Porque los amigos, lo que se diz amigos de verdá, por norma xeneral, cuntense colos deos d`una man, o a lo sumu les de les dos. Y por que amigos nun teniemos necesariamente que tener munchos, pero si procurar que seyan los meyores.

Amigu ye aquel que sigue siéndolo porque la distancia nun fixera l`olvidu, que predicaba la canción. Amigu ye aquel que siempre ye receptivu a la llamada d`ausiliu, al reclamu, a l`atención. Amigu ye aquel que nun traiciona. Que ye capaz de guardar un secretu aunque esti seya un secretu a voces. Amigu ye aquel que supera contigo la reválida de l`amistá. Porque l`amistá ye cosa de dos o más individuos, y ye absurdu creer n`amistá nun correspondía. A un tiempu que llíbrenos el diañu d`aquellos que s`autoerixen, les más de les vegaes de manera interesao, en amigos nuestros.

Otra cosa son los collacios, los compañeros de viaxe. Y ye que la vida nun ye otro qu`una sucesión de viaxes ensin destín. Fariasemos imposible viaxar a lo llargu y anchu de la vida si nun fuéramos a dir atopando bonos collacios de viaxe que mos ficieran más fácil tan llarga odisea. Compañeros y compañeres que por momentos serán casi comu hermanos. Desconocios y desconocies a los que fadremos confesiones que nun fadriamos nin a nuestra madre; quiciavis nin a nuestru meyor amigu.

Munchos, los más d`estos collacios, quedarán relegaos, co`l tiempu, a un segundu planu, comu`l amor que quedó deliberadamente escaecíu naquel puertu nun de los viaxes de la vida. Algunos seguirán por siempre calteniendo la so condición como talos, a lo menos siempre que viaxemos na mesma direición. Unos pocos, siempre los menos, llegarán a pasar la reválida conxunta y convertise n`amigos. Aunque nun por eso tenemos qu`escaecer que nesto de l`amistá, la evaluación ye continua.

Descubrir que los que considerabes amigos nun fueron más que bonos collacios d`un, o de dellos, de los viaxes de la vida tampocu ye una desdicha. Nin ellos nin tú sois culpables por nun pasar la reválida conxunta de l`amistá. Apaecerán nuevos compañeros de viaxe que quien sabe si llegarán a ser amigos y tornarás a atopate con vieyos conocíos colos que recorrer otra etapa d`esta incierta pero apasionante aventura de la vida.

Envía un Comentario

Tu dirección de correo electrónico no será publicada. Los campos obligatorios están marcados con *

Este sitio usa Akismet para reducir el spam. Aprende cómo se procesan los datos de tus comentarios.